لاہور( این این آئی)نامور اداکارہ مدیحہ شاہ نے کہا ہے کہ جب تک حکومت ایک،دو جنسی درندوں کو سرعام چوک چوراہے میں نہیں لٹکائے گی ایسے لوگ عبرت حاصل نہیں کریں گے ، حکومت اور قانون نافذ کرنے والے ادارے بڑھتے ہوئے واقعات پر سنجیدگی سے غور کریں اور ان کے تدارک کیلئے حکمت عملی مرتب کی جائے ۔ ایک انٹر ویو میں مدیحہ شاہ نے کہا کہ حالیہ دنوں میں جس طرح کے واقعات سامنے آئے ہیں اس سے معاشرے خصوصاً خواتین میں خوف پایاجاتا ہے جسے دور کرنے کی ضرورت ہے ۔ حکومت ایک طرف یہ اعلان کر رہی ہے کہ ہم خواتین کو قومی دھارے میں شامل کررہے ہیں اور دوسری جانب رات کے وقت شاہراہوں پر سفر کرنے والی خواتین محفوظ نہیں اور انہیں درندگی کا نشانہ بنایا جاتا ہے ۔ انہوں نے کہا کہ حکومت اور خصوصا ً قانون نافذ کرنے والے ادارے اس کے تدارک کے لئے سر جوڑ کر بیٹھیں اور سخت حکمت عملی اپنائیں۔
