اسلام آباد(این این آئی)پاکستان مسلم لیگ (ن) کے صدر اور قائد حزب اختلاف شہبازشریف نے سپیکر قومی اسمبلی اسد قیصر کو خط لکھ کہاہے کہ پارلیمنٹ کے مشترکہ اجلاس کا نامناسب عجلت میں بلایاجانا آپ کے مقام کو متنازعہ بناتا ہے،آپ نے مشترکہ اپوزیشن کو پارلیمانی روایات، قاعدے اور طریقہ کار کی پاسداری اوراس پر عمل کی یقین دہانی کرائی تھی،قومی اہمیت کے بلِز پر آپ کے جانبدارانہ روئیے اور مشترکہ اجلاس بلانے پر ایوان کے کسٹوڈین کے طورپر آپ پر اعتماد نہیں رہا،پارلیمنٹ کے مشترکہ اجلاس سے قبل اس بہیمانہ اور قابل مذمت غلطی کی آپ فوری اصلاح کریں۔ بدھ کو اپوزیشن لیڈر کی جانب سے لکھے گئے خط میں کہاگیاکہ میں نے 14 نومبر کو آپ کو خط لکھا تھا، 12 نومبر کے آپکے خط میں اتفاق رائے سے قومی امور طے کرنے سے اتفاق ہوا تھا۔ انہوںنے کہاکہ قانونی مسودوں پر اتفاق رائے کے لئے میں نے جامع تجاویز آپ کو دیں۔ شہباز شریف نے کہاکہ بدقسمتی سے آپ کا کوئی جواب نہیں آیا، آپ کے ارادوںپر شک پیدا ہوگیا ہے ،بِلز پر اتفاق رائے پیدا کرنے کی ہماری تجاویز پر غور کے بجائے 16 گھنٹے قبل مشترکہ اجلاس کا نوٹس ملا ہے۔ انہوںنے کہاکہ کیا اس طریقے سے قومی اہمیت کے معاملات پر اتفاق رائے پیدا ہوتا ہے؟: ،ہونے والی قانون سازی پر پاکستان کی تاریخ آپ کو یاد کرانا چاہتا ہوں۔
