اسرائیل کاامریکہ پر ایران پر فوجی حملے کے لیے دبائو ڈالنے کے لئے زور

0
54

تل ابیب (این این آئی)اسرائیلی ویب سائٹس نے انکشاف کیا ہے کہ وزیر دفاع بینی گینٹز اور موساد کے سربراہ ڈیوڈ بارنے واشنگٹن میں صدر جو بائیڈن کی انتظامیہ کے اعلی حکام کے ساتھ ملاقاتوں کے دوران امریکا پر ایرانی اہداف پر فوجی حملے کے لیے دبائو ڈالیں گے۔اسرائیلی ویب سائٹ کے مطابق گینٹز اور بارنے اپنے امریکی مذاکرات کاروں پر زور دیں گے کہ وہ ویانا میں تعطل کا شکار جوہری مذاکرات کو ایران کے بارے میں مزید فیصلہ کن اقدام کے طورپر لیں۔ وہ اس موقع کو امریکیوں پر دبائو کے لیے استعمال کریں گے تاکہ واشنگٹن کو تہران کے خلاف پلان بی پرعمل درآمد کے لیے تیار کرسکیں۔ایران کے خلاف سخت پابندیوں کے مطالبے کے علاوہ یہ بھی بتایا گیا کہ اسرائیلی امریکا سے ایران کے خلاف فوجی کارروائی کرنے کو کہیں گے۔اسرائیلی میڈیا کے مطابق کسی بھی ممکنہ امریکی حملے کا ہدف ایران میں جوہری تنصیبات نہیں بلکہ یمن میں ایرانی اڈے جیسی جگہیں ہوسکتی ہیں۔ رپورٹ میں مزید کہا گیا کہ اس آپشن سے ایران کو اپنے موقف میں لچک پیدا کرنے اور اسے مذاکرات کی میز پر لانے پرمجبور کرنا ہے۔اسرائیلی نیٹ ورک نے کہا کہ توقع ہے کہ اسرائیلی حکام امریکی انتظامیہ کو مطلع کریں گے کہ اسرائیل ایرانی اہداف کے خلاف اقدامات جاری رکھے گا۔