کرائسٹ چرچ (این این آئی )کرائسٹ چرچ حملہ آور کا مقابلہ کرنے پر نیوزی لینڈ کے دو شہریوں کو ملک کا اعلی ترین بہادری ایوارڈ دیا گیا ہے، حملہ آور سے مقابلے کے دوران شہید ہونے والے نعیم رشید اور زندہ بچنے والے عبدالعزیز کو نیوزی لینڈ کراس سے نوازا گیا۔غیرملکی خبررساں ادارے کے مطابق وزیر اعظم جیسنڈا آرڈن کا کہنا تھا کہ یہ ایوارڈ اعلی ترین وکٹوریا کراس کے مساوی سویلین ایوارڈ ہے، نیو زی لینڈ میں یہ ایوارڈ اس سے پہلے صرف دو مرتبہ دیا گیا ہے۔کرائسٹ چرچ حملہ آور کا مقابلہ کرنے والے مزید 8 افراد کو بہادری کے میڈل دیئے گئے ۔بہادری کے میڈلز حاصل کرنے والوں میں حملہ آور کو گرفتار کرنے والے 2 پولیس اہلکار بھی شامل ہیں جنہوں نے حملہ آور کو فرار ہونے سے روکا اور گرفتار کیا۔واضح رہے کہ کرائسٹ چرچ مساجد پر 2019 کے دہشت گرد حملے میں 51 مسلمان شہید ہوئے تھے۔
