لاہور( این این آئی)سینئر اداکار شفقت چیمہ نے کہا ہے کہ میں ہمیشہ سچی اور کھری بات کرتا ہوں،مجھ سے جو مرضی کام کر الیں لیکن مجھ سے منافقت نہیں ہوتی ،یہ بھی کوشش ہوتی ہے کہ کسی کی دل آزاری نہ ہو ،پاکستان میں ٹیلنٹ کی کمی نہیں اورایک دن فلم انڈسٹری کا عروج دوبارہ واپس آئے گا ۔ایک انٹرویو میں شفقت چیمہ نے کہاکہ انسان کی شخصیت میں کوئی جھول نہیں ہوناچاہیے تاکہ دیکھنے والاآ پ کے بارے میں تذبذب کا شکار نہ ہو۔انہوںنے کہا کہ فلم انڈسٹری میں جتنابھی کام کیا ہے محنت اورلگن سے کیا ہے اور خدا کی ذات نے مجھے اتنی کامیابیوں سے نوازاجس کامیںنے کبھی خواب میںبھی نہیںسوچا تھا۔ شفقت چیمہ نے کہا کہ ولن کا کرداراداکرناآسان نہیں ہوتاآپ کو اپنی شخصیت کی نفی کرکے کردارنبھانا پڑتاہے ، اگر ولن کا کردار نہ ہو تو پراجیکٹ میں جان پڑ ہی نہیں سکتی۔ انہوں نے کہا کہ لوگوںنے مجھے ولن کے کردارمیںپسند کیا تو اس کی بنیاد پر کیرئیر آگے بڑھتاگیا ۔
