لاہور (این این آئی)سماجی کارکن اور گلوکار شہزاد رائے نے آبادی اور فیملی پلاننگ کا سفیر مقرر کیے جانے کو اپنے لیے بڑا اعزاز اور اہم ذمے داری قرار دیا ہے۔ ایک انٹرویومیں شہزاد رائے کا کہنا ہے کہ آبادی میں اضافہ تقریباً تمام مسائل کی جڑ ہے۔انہوں نے کہا کہ جب تک آبادی پر قابو نہ پایا جائے تمام شعبوں میں کام فائدہ مند ثابت نہیں ہو پائے گا۔واضح رہے کہ گزشتہ روز حکومت نے سماجی کارکن اور معروف گلوکار شہزاد رائے کو آبادی اور فیملی پلاننگ کا سفیر مقرر کیا تھا۔صدر مملکت عارف علوی کی زیر صدارت وفاقی ٹاسک فورس پاپولیشن میٹنگ میں شہزاد رائے سے متعلق فیصلہ کیا گیا اور اس کا نوٹیفکیشن بھی جاری کیا گیا۔پاکستان میں آبادی وسائل کے مقابلے میں زیادہ تیزی سے بڑھ رہی ہے، شہزاد رائے اس حوالے سے عوام میں آگاہی فراہم کرنے میں اپنا کردار ادا کریں گے۔
