مریدکے(این این آئی) مسلم لیگ (ن) کے مرکزی رہنما رانا تنویر حسین نے کہا ہے کہ عدم اعتماد کی تحریک ہر صورت کامیاب ہوگی ،حکومت جتنے مرضی ہاتھ پائوں مارلے نمبر گیم پوری ہوچکی ۔مسلم لیگ (ن) یوتھ ونگ کے مرکزی رہنما رانا کاشف رحمن کے بھائی رانا منیب رحمن کی شادی کی تقریب میں میڈیا سے گفتگو کرتے انہوںنے کہاکہ قوم نوے فیصد موجودہ حکومت کیخلاف ہوچکی مہنگائی بے روزگاری بدامنی نے نئے پاکستان کا چہرہ قوم کو دکھا دیا اب قوم کہتی ہے میاں نواز شریف سے بہتر قیادت نہ تھی نہ آئے گی ،ہمارے دور میں عوام خوشحال تھی ،اسٹاک ایکسچینج دنیا میں نمبر ون تھی معیشت ترقی کی شاہراہ پر گامزن تھی ،اب گھی آٹا چینی پیٹرول ڈیزل ہر چیز عوام کی پہنچ سے دور ہوچکے ہیں ،عمران خان سن لیں اب یہ قوم انہیں کوئی این آر او نہیں دے گی ۔انہوں نے کہا حکومتی ایوانوں میں ہلچل بے چینی اس بات کی گواہ ہے اسے اپنا انجام نظر آرہا ہے مشکل وقت گزر چکا قوم تھوڑا انتظار کرے موجودہ حکمرانوں سے جان چھوٹ جائے گی پاکستان میں اصل قیادت آنے والی ہے جس کی جڑیں عوام میں ہیں ۔انہوں نے کہا حکومتی اراکین کی اکثریت بھی چاہتی ہے عمران خان سے جان چھوٹے ہم نے حکومتی اراکین کے بغیر ہی الحمدللہ نبمر گیم پوری کرلی ہے وقت آنے پر عدم اعتماد پیش کردی جائے گی اور یہ کامیاب ہوگی اس سلسلہ میں ہوم ورک اور مشاورت مکمل کرلی گئی ہے۔
