اسلام آباد (این این آئی) پاکستان مسلم لیگ (ن) نے کہاہے کہ کسی سے ہاتھ نہ ملانے والا عمران خان ایک ایک آدمی کے پیچھے دھکے کھاتا پھر رہاہے ،تحریک عدم اعتماد کو کامیاب بنانے کیلئے جو بھی قیمت ادا کر نا پڑی کرینگے ،مسلم لیگ ن کے سپورٹر اور کارکنوں کا ملین مارچ ہوگا،مارچ لاہور سے چلے گا اور دو دن میں اسلام آباد پہنچے گا۔ ان خیالات کا اظہار مسلم لیگ (ن) کے صدر رانا ثناء اللہ نے سابق سپیکر قومی اسمبلی سر دار ایاز صادق کے ہمراہ میڈیا سے گفتگو کرتے ہوئے کیا ۔رانا ثناء اللہ نے کہاکہ خبریں بڑے دلچسپ پیرائے میں داخل ہورہی ہیں،اگر یہ اجلاس آگے لیکر نہ جاتے تو آج واضح کردیتے ۔ انہوںنے کہاکہ یہ زیادہ سے زیادہ وقت لینا چاہتے ہیں ہم بھی یہی چاہتے ہیں۔ رانا ثناء اللہ نے کہاکہ ہم سمجھتے ہیں یہ زیادہ سے زیادہ وقت لیں ،خجل ہوں ذلیل ہوں خراب ہوں، عمران خان کسی کے ساتھ ہاتھ ملانا گوارہ نہیں کرتا تھا ۔ انہوںنے کہاکہ آج ایک ایک آدمی کے پیچھے دکھے کھاتاپھر رہا ہے ۔ انہوںنے کہاکہ ستائیس مارچ کو یہ جلسہ کررہے ہیں،ہمارے قافلے 23مارچ کو چلیں گے ،مسلم لیگ ن کے سپورٹر اور کارکنوں کا ملین مارچ ہوگا،لاہور سے چلے گا اور دو دن میں اسلام آباد پہنچے گا۔ رانا ثناء اللہ نے کہاکہ پارٹی نے تمام اختیار نواز شریف اور شہباز شریف کو دے دیا۔ رانا ثناء اللہ نے کہاکہ وہ اس تحریک کو کامیاب کرنے کیلئے جو قیمت ادا کرنا پڑتی ہے کریں اس میں وزارت اعلیٰ ہویا وزارت یا سپیکر شپ ہو کچھ بھی،آگے وہ اپنا اختیار کس طرح استعمال کرتے ہیں یہ ان کی صوابدید پر ہے۔ اس موقع پر سر دار ایاز صادق نے کہاکہ دسمبر میں کہا تھا کہ میری مسکراہٹ دیکھیں، تحریک عدم اعتماد کی کامیابی کے لئے ہر امید ہے، تحریک عدم اعتماد کی کامیابی میں عمران خان کے زبان کا بڑا ہاتھ ہوگاے۔ ایک سوال پر انہوںنے کہاکہ اللہ کے گھر بہت امید ہے اللہ بہتر کریں گے۔
