اسلام آباد (این این آئی)آسٹرین وزیر خارجہ الیگزینڈر شلنبرگ نے وزارتِ خارجہ میں وزیر خارجہ مخدوم شاہ محمود قریشی کیساتھ ملاقات کی جس میں دوطرفہ تعلقات سمیت مختلف امورپر تبادلہ خیال کیا گیا ۔ جمعرات کو وزیر خارجہ نے پاکستان تشریف آوری پر آسٹرین ہم منصب کو خوش آمدید کہا بعدازاں ملاقات میں گفتگو کرتے ہوئے وزیر خارجہ شاہ محمود قریشی نے کہاکہ پاکستان آسٹریا کے ساتھ اپنے تعلقات کو بہت اہمیت دیتا ہے،پاکستان آسٹریا کو یورپی یونین کا اہم ملک گردانتا ہے، مخدوم شاہ محمود قریشی نے کہاکہ آپ کے دورے سے دوطرفہ تعلقات کو مزید مضبوط بنانے میں مدد ملے گی۔مخدوم شاہ محمود قریشی نے کہاکہ حال ہی میں وزیر اعظم نے آسٹریا کے چانسلر عزت مآب کارل نیہمر سے بات چیت کی اور دو طرفہ تعلقات کی مختلف جہتوں پر گفتگو کی۔انہوںنے کہاکہ پاکستان اور آسٹریا کے درمیان دوطرفہ تجارت میں اضافے کے وسیع امکانات موجود ہیں۔مخدوم شاہ محمود قریشی نے کہاکہ آسٹریا کی کمپنیوں کے لیے پاکستان میں قابل تجدید توانائی، سیاحت، ہاؤسنگ، زراعت اور انفارمیشن ٹیکنالوجی کے شعبوں میں سرمایہ کاری کے بہترین مواقع موجود ہیں۔مخدوم شاہ محمود قریشی نے کہاکہ سی پیک کے خصوصی اقتصادی زونز، آسٹریا کے سرمایہ کاروں کے لیے پرکشش مراعات اور ٹیکس کی چھوٹ کے پیش نظر سرمایہ کاری کے پرکشش مواقع موجود ہیں، ہمیں امید ہے کہ آسٹریا اس سال GSP سٹیٹس کے چوتھے دو سالہ جائزے میں پاکستان کی حمایت جاری رکھے گا
