اسلام آباد (این این آئی)وزیراعظم کی دعوت کے باجود خالد مقبول صدیقی نے کابینہ اجلاس میں شرکت سے انکار کردیا۔ذرائع کے مطابق وزیراعظم عمران خان کی جانب سے دھمکی آمیز خط اینکر پرسنز کو دکھانے کے اعلان پر وفاقی کابینہ کے ارکان نے تشویش کا اظہار کیا اور خط پہلے کابینہ ارکان کو دکھانے کا مطالبہ کیا۔ذرائع کے مطابق کابینہ ارکان کی تشویش پر وزیراعظم عمران خان نے کابینہ کا ہنگامی اجلاس طلب کیا جس میں ارکان کو خط دکھانے کا فیصلہ کیاگیا ۔ذرائع کے مطابق وزیراعظم عمران خان نے کابینہ کے اجلاس میں ایم کیو ایم کے خالد مقبول صدیقی اور بلوچستان سے خالد مگسی کو بھی خصوصی طور پر مدعو کیا تھا لیکن دونوں کی اجلاس میں موجودگی ممکن نہ ہوسکی۔ذرائع کے مطابق خالد مقبول صدیقی نے مصروفیت کے باعث اجلاس میں آنے سے انکار کردیا جبکہ خالد مگسی سے کوئی رابطہ نہیں ہوسکا۔ذرائع نے بتایا کہ دونوں پارلیمانی لیڈرز کو وزیراعظم نے خط دکھانے کیلئے اجلاس میں مدعو کیا تھا۔
