اسلام آباد (این این آئی) وفاقی وزیر خزانہ مفتاح اسماعیل نے کہا ہے کہ پاکستان اور ناروے کے درمیان باہمی تعلقات قابل ستائش ہیں، ناروے کیساتھ باہمی اقتصادی تعلقات کو وسعت دینے کیلئے حکومت مکمل تعاون کرے گی۔ تفصیلات کے مطابق منگل کو وزیر خزانہ مفتاح اسماعیل سے پاکستان میں ناروے کے سفیر نے ملاقات کی ۔ ملاقات کے دوران باہمی دلچسپی کے امور پر تبادلہ خیال کیا گیا ۔ وزیر خارجہ نے کہا کہ دونوں ممالک کے درمیان قابل ستائش باہمی تعلقات ہیں، وفاقی وزیر نے ناروے کے سفیر کو پائیدار ترقی کیلئے حکومت کی اقتصادی پالیسیوں اور ترجیحات کے بارے میں بتایا۔ناروے کے سفیر نے کہا کہ دونوں ممالک کے درمیان بہترین اور مثالی تعلقات ہیں،ناروے کے سفیر نے اقتصادی تعلقات کو مزید فروغ دینے کی ضرورت پر زور دیا۔وفاقی وزیر خزانہ نے باہمی اقتصادی تعلقات کو وسعت دینے کیلئے حکومت کی مکمل حمایت اور تعاون کا اظہار کیا۔
