ممبئی (این این آئی)اہلیہ سے طلاق کے بعد نامور بھارتی موسیقار و گلوکار اے آر رحمان سے متعلق یہ افواہیں زیر گردش ہیں کہ وہ اپنے کام سے بریک لینے والے ہیں۔ اے آر رحمان اور ان کی اہلیہ سائرہ بانو نے 29 سالہ شادی کے بعد طلاق کا اعلان کیا۔ اس جوڑے کے تین بچے ہیں جن میں ایک بیٹا اے آر امین جبکہ دو بیٹیاں خدیجہ اور رہیمہ شامل ہیں۔ گزشتہ ماہ قانونی نمائندوں کے ذریعے علیحدگی کا اعلان کرنے کے بعد یہ خبریں گردش کرنے لگیں کہ معروف موسیقار اے آر رحمان سال بھر کے لیے موسیقی سے وقفہ لینے والے ہیں۔تاہم انکی بیٹی خدیجہ رحمان اور بیٹے امین نے ان افواہوں کی سختی سے تردید کردی۔ سوشل میڈیا پلیٹ فارم ایکس پر ایک پوسٹ شیئر کی گئی جس میں کہا گیا کہ اے آر رحمان موسیقی سے وقفہ لینے والے ہیں، جس پر بیٹی خدیجہ نے ردِ عمل دیتے ہوئے کہا کہ براہِ کرم ایسی بیکار افواہیں پھیلانا بند کریں۔اے آر رحمان کے بیٹے امین نے بھی ان افواہوں کا جواب دیا اور اپنی انسٹاگرام اسٹوری میں اس خبر کا اسکرین شاٹ شیئر کرتے ہوئے لکھا کہ یہ جھوٹی خبر ہے۔ یہ غلط ہے۔
