لاہور( این این آئی) پراونشینل ڈائزاسٹر مینجمنٹ اتھارٹی پنجاب نے اپنی سیلا ب متا ثر ین بارے امداری سر گرمیو ں بارے جار ی رپور ٹ میں کہاہے کہ سیلاب میں پھنسے 38,143سے زائد افراد کو سیلابی علاقوں سے بحفاظت ریسکیو کر لیا گیا ہے،سیلابی علاقوں میں 67,797افراد کو علاج معالجے کی سہولیات فراہم کی گئی ہیں،سیلاب متاثرین کیلئے 99فلڈ ریلیف کیمپس قائم ہیں۔حکومت پنجاب کی ہدایات کے مطابق سیلاب متاثرین تک تین وقت کا کھانا اور صاف پانی سمیت دیگر ضروری سہولیات کی فراہمی کا عمل جاری ہے۔ترجمان پی ڈی ایم اے کے مطا بق سیلاب متاثرین کے 64,974بڑے اور 114,977 چھوٹے جانوروں کو بیماریوں سے بچاو کی ویکسین لگائی جا چکی۔اب تک 39,437 گھرانوں میں ایک ماہ کے لیے خشک راشن تقسیم کیا جا چکا۔اب تک 22267گھرانوں میں ٹینٹس تقسیم کیے جا چکے ہیں۔دور دراز اور کٹھن علاقوں میں ہیلی کاپٹر کے ذریعے سیلاب متاثرین تک خوراک پہنچانے کا عمل بھی جاری ہے۔ریسکیو ریلیف آپریشن میں پاک فوج ریسکیو 1122 سمیت دیگر ادارے حصہ لے رہے ہیں،حکومت پنجاب کی ہدایت پر سیلاب متاثرین کو ریلیف فراہم کرنے کے لیے تمام وسائل کو بروئے کار لایا جا رہا ہے ۔
