اسلام آباد(این این آئی)پاکستان تحریک ا نصاف کے رہنما فواد چوہدری کا ٹوئٹر اکاؤنٹ ہیک ہونے کے بعد بحال ہوگیا جس کی تصدیق انہوں نے ٹوئٹر اکاؤنٹ کے ذریعے ہی کی۔سابق وفاقی وزیر اطلاعات فواد چوہدری کا ٹوئٹر اکاؤنٹ گزشتہ رات ہیک ہوا جس کی ہفتہ کی صبح خود سیاسی رہنما کی جانب سے تصدیق کی گئی تاہم اچھنبے کی بات یہ ہے کہ کچھ دیر بعد فواد چوہدری نے تصدیقی ٹوئٹ بھی ڈیلیٹ کر دی۔اس سے قبل فواد چوہدری کے تصدیق شدہ ٹوئٹر اکاؤنٹ سے ہیک کے دوران پاکستان ڈیموکریٹک موومنٹ اور جے یو آئی ف کے سربراہ مولانا فضل الرحمان کے انتقال کی خبر شیئر کی گئی تھی جس کے سکرین شاٹس سوشل میڈیا پر اب بھی وائرل ہیں۔ہیکرز نے پی ٹی آئی رہنما کے اکاؤنٹ سے ٹوئٹ کیا کہ میں جھوٹا ہوں، میرا اکاؤنٹ ہیک نہیں کیا گیا۔اس کے علاوہ ہیکرز نے فواد چوہدری کے ٹوئٹر اکاؤنٹ کی تصویر بھی تبدیل کرکے فضل الرحمن کی لگا دی تھی اور کور فوٹو پر مریم نواز اور نواز شریف کی تصویر لگائی گئی تھی۔
