اسلام آباد (این این آئی)اسلام آباد ہائیکورٹ نے توہین عدالت کیس میں سابق وزیراعظم عمران خان کی عدالت پیشی سے متعلق ضابطہ اخلاق جاری کردیا۔رجسٹرار آفس سے جاری سرکلرکے مطابق کمرہ عدالت نمبر ایک میں داخلہ صرف رجسٹرار آفس کے جاری کردہ پاس سے مشروط ہو گا۔اسلام آباد ہائیکورٹ کے رجسٹرار آفس نے عمران خان کے خلاف توہین عدالت کارروائی سے متعلق سرکلر جاری کردیا ہے جس میں کہا گیا کہ عمران خان کی لیگل ٹیم کے 15 وکلا کمرہ عدالت میں موجود ہو سکیں گے،اٹارنی جنرل آفس اور ایڈوکیٹ جنرل آفس سے 15 لا افسران کے علاوہ تین عدالتی معاونین کو کمرہ عدالت جانے کی اجازت ہوگی، سرکلر کے مطابق15 کورٹ رپورٹرز کو کمرہ عدالت میں موجودگی کی اجازت ہو گی،ہائی کورٹ اور ڈسٹرکٹ بار کے پانچ پانچ وکلاء کمرہ عدالت جاسکیں گے،سرکلر میں یہ ہدایت بھی کی گئی ہے کہ عمران خان کی لیگل ٹیم، وکلاء باڈیز، اٹارنی جنرل، ایڈووکیٹ جنرل آفس 5 ستمبر تک فہرستیں جمع کرائیں،اسلام آباد ہائیکورٹ جرنلسٹس ایسوسی ایشن کو بھی 15 صحافیوں کی لسٹ جمع کرانے کی ہدایت کرتے ہوئے کہا گیا ہے کہ لسٹوں کی فراہمی کے بعد اسلام آباد ہائی کورٹ کا رجسٹرار آفس پاس جاری کرے گا،کورٹ ڈیکورم کو برقرار رکھنے کے لیے اسلام آباد انتظامیہ اور پولیس سیکورٹی انتظامات کرے، لارجر بنچ 8 ستمبر کو دن ڈھائی بجے کیس کی سماعت کرے گا۔
