اسلام آباد (این این آئی)وفاقی وزیر برائے قومی صحت عبدالقادر پٹیل نے کہا ہے کہ پشین میں نامعلوم افراد کی فائرنگ سے پولیو ٹیم کی حفاظت پر مامور پولیس اہلکار کی شہادت کا واقعہ قابل مذمت ہے، ہم شہید اہلکار کے خاندان کے غم میں برابر کے شریک ہیں، سکیورٹی اداروں نے ملک کے مستقبل کو معذوری سے بچانے میں اہم کردار ادا کیا ہے۔ منگل کو اپنے ایک بیان میں انہوں نے کہا کہ پولیس اہلکار کی قربانی رائیگاں نہیں جائے گی، ہم شہید اہلکار کے خاندان کے غم میں برابر کے شریک ہیں۔ انہوں نے کہا کہ پیر سے شروع ہونے والی انسداد پولیو مہم ملک کے 83 اضلاع میں جاری ہے، ملک دشمن عناصر ہمارے حوصلے پست نہیں کر سکتے۔ عبدالقادر پٹیل نے کہا کہ ملک بھر سے پولیو کے خاتمہ کے لئے تمام وسائل بروئے کار لا رہے ہیں۔
