اسلام آباد (این این آئی)وفاقی وزیر برائے ماحولیاتی تبدیلی شیری رحمان نے کہا ہے کہ ماحولیات مکمل طور پر سائنسی ماڈلز پر مبنی ہے،تخفیف اور موافقت کے ماڈلز پر کام کرنے کے لیے ہمیں کثرت سے ملنا چاہیے۔ 21ویں صدی میں اعلیٰ تعلیم اور افرادی قوت کی ترقی پر بین الاقوامی سمٹ سے خطاب کرتے ہوئے انہوںنے کہاکہ ماحولیات مکمل طور پر سائنسی ماڈلز پر مبنی ہے۔ وفاقی وزیر نے کہاکہ میں تمام ترقیاتی شعبوں اور شراکت داروں سے کہوں گی کہ وہ ماحولیاتی تبدیلی کے حوالے سے اپنے منصوبوں اور وسائل میں اضافہ کریں۔ شیری رحمن نے کہاکہ تخفیف اور موافقت کے ماڈلز پر کام کرنے کے لیے ہمیں کثرت سے ملنا چاہیے۔ وفاقی وزیر نے کہاکہ ماحولیاتی تبدیلی، تخفیف، موافقت کے منصوبوں کو زمینی مسائل پر توجہ دینے کی ضرورت ہے۔ وفاقی وزیر نے کہاکہ سیلاب کی وجہ سے پاکستان کے شہروں اور گائوں کی آبادی اور جغرافیہ بدل گیا ہے۔ شیری رحمن نے کہاکہ متاثرہ کمیونٹیز کو بحالی میں طویل عرصے لگے گا۔ وفاقی وزیر نے کہاکہ ماحولیاتی تبدیلی نے معاشی، تعلیم اور صحت کے شعبے کو بری طرح متاثر کیا ہے۔ وفاقی وزیر نے کہاکہ متاثرہ خاندان اپنے گھر، مویشی اور فصلیں کھو چکے ہیں، اب ہمارے تعلیم اور ترقی کے شعبے پر منحصر ہے کہ ہم لوگوں کو ان کے خوابوں کی بحالی میں مدد کریں۔ شیری رحمن نے کہاکہ مجھے تشویش ہے کہ لوگوں کو ماحولیاتی تبدیلی کے بارے میں بہت کم علم ہے، ہمیں ہر سطح پر ماحولیاتی تبدیلی کو نصاب کا حصہ بنانے کی ضرورت ہے۔ وفاقی وزیر نے کہاکہ ماحولیاتی تبدیلی کو تعلیم کا حصہ بنانے کی ضرورت ہے، ہمیں اپنی یونیورسٹیوں میں ماحولیاتی تبدیلی کے شعبوں کی تعمیر کی ضرورت ہے۔وفاقی وزیر نے کہاکہ ہمیں ماحولیات کے ماہرین اور سائنسدانوں کی سخت ضرورت ہے، آج بھی سرکاری محکمے تنہائی میں کام کر رہے ہیں۔ شیری رحمن نے کہاکہ تمام شعبوں اور شراکت داروں کو مل کر کام کرنے کی ضرورت ہے۔
