گجرات،سرکاری ہسپتال کا نام بدلنیکی کوشش، پرویز الٰہی کے بھتیجے پر اینٹوں سے حملہ، موسیٰ الٰہی نے بھاگ کر خود کو بچایا

0
92

گجرات (این این آئی)گجرات کے سرکاری ہسپتال کانام بدلنے کی کوشش پرجھگڑے میں وزیراعلیٰ پنجاب پرویز الٰہی کے بھتیجے پر اینٹوں سے حملہ کردیا گیا تاہم موسیٰ الٰہی نے بھاگ کر خود کو بچایا ۔ اطلاعات کے مطابق چوہدری پرویزالٰہی کے بھتیجے چوہدری موسیٰ سرکاری ہسپتال کی اپ گریڈیشن کا افتتاح کرنے آئے تھے اور ہسپتال کا نام بدل کر چوہدری ظہور الٰہی کے نام سے منسوب کیا جارہا تھا۔ نام تبدیل کرنے پر مقامی افراد کی جانب سے تقریب رکوانے کی کوشش کی گئی جس پر موسی الٰہی کے ساتھیوں کی جانب سے فائرنگ کی گئی، جوابی کارروائی کرتے ہوئے مقامی افراد نے بھی موسیٰ الٰہی اور ان کے ساتھیوں پر ڈنڈوں اور اینٹوں سے حملہ کیا۔حملے میں موسیٰ الٰہی نے بھاگ کرخود کو بچایا اور واقعہ کا مقدمہ تقریب روکنے والوں کیخلاف درج کروایا جس میں 34 افراد کو نامزد کیا گیا اور 200 افراد کو نامعلوم قرار دیا گیا ہے۔تقریب روکنے والوں نے کہاکہ ان کے آباواجداد نے ہسپتال کیلئے زمین دی تھی، ہسپتال کو چوہدری ظہور الٰہی کے نام سے منسوب کرنا زیادتی ہوگا۔