اسلام آباد (این این آئی)اسپیکر قومی اسمبلی راجہ پرویز اشرف سے ترکمانستان کے سفیر عطاجان مولاموف نے ملاقات کی جس میں دوطرفہ تعلقات سمیت باہمی دلچسپی کے دیگر امور پر تبادلہ خیال کیا گیا ۔ بدھ کو جاری اعلامیہ کے مطابق اسپیکر قومی اسمبلی نے کہاکہ پاکستان، ترکمانستان کیساتھ دوستانہ تعلقات کو بڑی اہمیت دیتا ہے۔ انہوںنے کہاکہ ترکمانستان خطے کا اہم ملک ہے۔ راجہ پرویز اشرف نے کہاکہ پاکستان، ترکمانستان کے ساتھ پارلیمانی اور اقتصادی شعبوں میں تعاون کو فروغ دے کر دوطرفہ تعلقات کو مزید مستحکم بنانا چاہتا ہے۔ اسپیکر قومی اسمبلی نے کہاکہ دوطرفہ پارلیمانی تعاون کے فروغ سے دونوں ممالک کے اراکین پارلیمنٹ کو ایک دوسرے کے تجربات سے استفادہ ہونے کا موقع ملے گا۔ ترکمانستان سفیر نے کہاکہ ترکمانستان پاکستان کے ساتھ برادرانہ اور دوستانہ تعلقات کو قدر کی نگاہ سے دیکھتا ہے۔انہوںنے کہاکہ ترکمانستان اور پاکستان کے عوام ایک دوسرے کے ساتھ گہری وابستگی رکھتے ہیں۔ انہوںنے کہاکہ ترکمانستان پاکستان کے ساتھ دوطرفہ پارلیمانی تعلقات کو وسعت دینا چاہتا ہے۔
