ضمنی انتخابات میں پیپلز پارٹی نے تمام نشستوں پر اپنے امیدوار کھڑے کئے ہیں،سعید غنی

0
630

کراچی (این این آئی)پاکستان پیپلز پارٹی کراچی ڈویژن کے صدر و صوبائی وزیر سعید غنی نے کہا ہے کہ مارچ کو ہونے والے کراچی کے 9 حلقوں میں قومی اسمبلی کے ضمنی انتخابات میں پیپلز پارٹی نے تمام نشستوں پر اپنے امیدوار کھڑے کئے ہیں اور انشااللہ پیپلز پارٹی تمام حلقوں میں عوام کے ووٹوں کی طاقت سے بھرپور کامیابی حاصل کرے گی۔ ان خیالات کا اظہار انہوں نے جمعرات کے روز ان کی صدارت میں منعقدہ کراچی ڈویژن کے اجلاس سے خطاب کرتے ہوئے کیا۔ اجلاس میں پیپلزپارٹی کراچی ڈویژن کے جنرل سیکرٹری جاوید ناگوری، نجمی عالم، محمد آصف خان، تمام ڈسٹرکٹ کے صدور و جنرل سیکرٹریز موجود تھے۔ اجلاس میں بلدیاتی انتخابات میں پارٹی کی پوزیشن اور الیکشن کے بعد کی صورتحال، مخصوص نشستوں کے لئے نامزدگیاں، کراچی میں 9 نشستوں پر ہونے والے قومی اسمبلی کے ضمنی انتخابات سمیت دیگر امور پر تبادلہ خیال کیا گیا۔ اس موقع پر سعید غنی نے کہا کہ پاکستان پیپلز پارٹی نے کراچی میں حالیہ بلدیاتی انتخابات میں تمام اضلاع کے عہدیداروں اور کارکنوں نے بہت اچھا کام کیا ہے۔ انہون نے کہا کہ تمام اضلاع اپنے اپنے ضلع سے مخصوص نشستوں کے نام کراچی ڈویژن تک لازمی ایک سے دو روز میں پہنچا دیں۔ سعید غنی نے کہا کہ نئی شروع ہونے والی مردم شماری کے حوالے سے تمام اضلاع کے صدور اور جنرل سیکرٹریز اپنے اپنے اضلاع میں مردم شماری کے حوالے سے آنے والی ٹیموں کے ساتھ تعاون کریں اور ایک ایک گھر کے تمام افراد کی گھر شماری کو یقینی بنائیں۔ سعید غنی نے مزید کہا کہ 16 مارچ کو ہونے والے کراچی کے 9 حلقوں میں قومی اسمبلی کے ضمنی انتخابات میں پیپلز پارٹی نے تمام نشستوں پر اپنے امیدوار کھڑے کئے ہیں اور امیدواروں کی حتمی فہرست جلد ہی جاری کردی جائے گی۔ سعید غنی نے کہا کہ جن جن حلقوں میں ضمنی انتخابات ہونے ہیں وہاں پر انتخابی سرگرمیوں کا آغاز کردیا جائے اور ان حلقوں میں پولنگ ایجنٹ اور دیگر کی تیاریوں کا آغاز کردیا جائے ساتھ ہی عوامی رابطہ مہم شروع کی جائے تاکہ ضمنی انتخابات میں ووٹوں کا تناسب بڑھایا جاسکے۔ سعید غنی نے کہا کہ 16 مارچ کو ہونے والے ضمنی الیکشن کو ہمیں آنے والے عام انتخابات کے ٹرائل کے طور پر لینا ہوگا