پشاور (این این آئی)وفاقی وزیر مذہبی امور مفتی عبدالشکور نے کہا ہے کہ ہم عصری اور دینی تعلیم میں تفریق نہیں سمجھتے ،تعلیمی لحاظ سے ہم دنیا سے بہت پیچھے ہیں، دینی تعلیم کے ساتھ فنی اورسائنسی تعلیم کی اشد ضرورت ہے،ان خیالات کا اظہار انھوں نے جمعرات کو پشاور میں معارف القرآن سکول سسٹم میں حفاظ کرام کی دستار بندی کی تقریب کے موقع پر بحیثیت مہمان خصوصی خطاب کرتے ہوئے کیا۔تقریب میں نگران صوبائی وزیر تعلیم رحمت سلام خٹک،صوبائی جنرل سیکرٹری جمعیت علما اسلام کے رہنمامولانا عطا الحق درویش ،مصر کے معروف قاری صالح عبداللہ،سکول کے منتظمین ،اساتذہ ،طلبا اور ان کے والدین نے شرکت کی، وفاقی وزیر نے کہا کہ اسلام دین فطرت ہے ہم دنیاوی اور دینی علوم میں فرق کے قائل نہیں ہیں ۔انھوں نے کہا کہ عصری اور دینی تعلیم ایک ہے، تعلیمی اداروں کے ماحول کو دینی خطوط پر استوار کرنا وقت کی اشد ضرورت ہے ۔ مفتی عبدالشکور نے کہا کہ میں ایک مدرسے کا پڑھا ہوا ہو اور وفاقی وزیر کی ذمہ داری انجام دے رہا ہوں۔انھوں نے کہا کہ جمعیت کے کسی ایک وزیر پر کوئی بدعنوانی کا الزام نہیں ،سابق حکومت کرپشن پر بھی فخر کرتے تھے اور ان کی کرپشن سے ملک تباہی کے دھانے پر پہنچ گیا ہے۔ انہوں نے کہا کہ پاکستانی روپے کے قدر میں کمی کی وجہ سے حج مہنگا ہو گیا ہے تاہم وزارت مذہبی اموراس کو سنجیدگی سے لے رہی ہے اورہماری کوشش ہے کہ روپے کی قدر میں کمی کے باوجود حج سستا ہو،بعدازاں وفاقی وزیر نے حفظ قرآن مکمل کرنے والوں طلبا کی دستار بندی کی اوراسناد تقسیم کیں۔
