لاہور( این این آئی) نامور اداکار حیدر سلطان نے کہا ہے کہ میرے والد سلطان راہی مرحوم ایک بڑے فنکار تھے اور انہوں نے اپنے کیرئیر میں جتنا کام کیا وہ ایک عالمی ریکارڈ بھی ہے ، جس سے بھی پوچھ لیں وہ آپ کو یہی کہے گا سلطان راہی ایک ہی تھا اور کوئی ان کی جگہ نہیں لے سکتا۔ ایک انٹر ویو میں حیدر سلطان نے کہا کہ والد مرحوم سے جڑی ہوئی یادیں میرے ساتھ رہتی ہیں ، میری حتی الامکان یہ کوشش ہوتی ہے کہ کوئی بھی ایسا عمل نہ کروں جس سے میرے والد مرحوم کی نیک نامی پر کوئی حرف آئے ۔انہوں نے کہا کہ میں سلطان راہی کے مقام تک تو نہیں پہنچ سکتا لیکن میری کوشش ہے کہ اچھے سے اچھا کام کروں اور اس کے لئے اپنی طور پر ہر ممکن کاوشیں جاری رکھتا ہوں ۔انہوں نے بتایا کہ پرستار مجھے عید الاضحی پر بڑی سکرین پر دیکھ سکیں گے ۔
