اسلام آباد (این این آئی)حکومت نے بینظیر انکم اسپورٹ پروگرام کی رقم 250ارب روپے سے بڑھا کر 364ارب روپے کردی ہے ۔بجٹ دستاویز کے مطابق وفاقی حکومت نے مالی سال 2023-24ء میں بینظیر انکم سپورٹ پروگرام کی مختص رقم میں اضافہ کیا ہے، 2021-22میں یہ رقم 250ارب روپے تھی جو اب بڑھا کر 364ارب روپے کردی گئی ہے۔نئے مالی سال میں بینظیر انکم اسپورٹ پروگرام کے تحت 90لاکھ خاندانوں کو بینظیر کفالت کیس ٹرانسفر پروگرام کی سہولت میسر ہوگی، جس کیلئے 266ارب روپے رکھے گئے ہیں۔بے نظیر تعلیمی وظائف پروگرام کا دائرہ بھی ایک کروڑ بچوں تک بڑھایا جائے گا جس کیلئے 35ارب روپے سے زائد رقم رکھی گئی ہے۔ جبکہ 10ہزار طلبا کو بے نظیر انڈر گریجویٹ اسکالر شپ دیا جائے گا، جس کیلئے 9 ارب روپے سے زائد رقم مختص کی گئی ہے۔ بینظیر نشوونما پروگرام تمام اضلاع تک بڑھایا جائے گا، جس پر تقریبا 5.21 ارب روپے لاگت آئے گی، جب کہ 6ارب روپے مستحق افراد کے علاج و امدادکیلئے پاکستان بیت المال میں رکھے گئے ہیں۔
