رائے ونڈ (این این آئی)اداکارہ فرح ناز نے کہا ہے کہ دبئی کلب کلچر کو ملک میں متعارف کروانے والی لابی درحقیقت اسٹیج کی تباہی کی ذمہ دار ہے ۔”این این آئی”سے خصوصی گفتگو کرتے ہوئے فرح ناز نے کہا کہ ایک وقت تھا کہ آرٹسٹ کی ایک جھلک دیکھنے کیلئے پرستار گھنٹوں انتظار کرتے تھے لیکن آج آرٹ اور آرٹسٹ کی تذلیل ہو رہی ہے ۔ایک سوال کے جواب میں انہوں نے کہا کہ اسٹیج کی بربادی کے اصل ذمہ داران وہ پروڈیوسر ز ہیں جوفنکاروں کو نشستیں فروخت کرنے پر مجبور کرتے ہیں ،آرٹ کی تباہی اس سے زیادہ اور کیا ہو سکتی ہے کہ بغیر اسکرپٹ کے ڈرامے چل رہے ہیں ،نوجوان نسل کو تفریح کے نام پر فحاشی اور عریانی دکھائی جارہی ہے ،ڈراموں میں سبق آموز اسکرپٹ نکال کر صرف فحش ڈانس تک محدود کردیا گیا ہے ۔ انہوںنے کہا کہ اسٹیج کی جو ساکھ بن چکی ہے اس کی وجہ سے بہت سے فنکار شرمندگی محسوس کرتے ہیں ۔
