لاہور( این این آئی)گردوں کے عارضہ میں مبتلا نامور گلوکار اسد عباس کی اہلیہ نے وزیر اعظم شہباز شریف اور نگران وزیر اعلیٰ پنجاب محسن نقوی سے اپنے شوہر کے علاج معالجہ میں مدد کی اپیل کر دی ۔گلوکار اسد عباس کی اہلیہ نے بتایا کہ ان کے شوہر گزشتہ چار سالوں سے گردوں کے عارضہ میں مبتلا ہیں ،ایک بھائی نے چار سال پہلے گردے کا عطیہ دیا تھا لیکن وہ بھی ناکارہ ہو چکا ہے ، اس صدمے کی وجہ سے اسد عباس کی والدہ اور ہمشیرہ بھی دنیا سے رخصت ہو گئیں۔ انہوں نے کہا کہ ہم اپنے طور پر ہر طرح کی کاوشیں کر چکے ہیں ۔ وزیر اعظم شہباز شریف اورنگران وزیر اعلیٰ پنجاب محسن نقوی سے اپیل ہے کہ جس طرح عمر شریف اور گلوکار عالمگیر کا علاج معالجہ کرایا گیا اسی طرح اسد عباس کے علاج معالجے کیلئے بھی احکامات جاری کئے جائیں تاکہ ان کی جان بچائی جاسکے۔انہوں نے کہا کہ حکومت سے اپیل ہے کہ کسی قریبی رشتہ دار کاگردہ عطیہ کرنے کی بھی خصوصی اجاز ت دی جائے گی ۔انہوں نے کہا کہ میرا بیٹا بھی بڑی آنت کے مرض میں مبتلا ہے ، بہت دکھی اوربے بس ہو کر خدا کی ذات کے بعد وزیر اعظم اور وزیر اعلیٰ سے اپیل کررہی ہوں کہ وہ میری درخواست کو سنیں ۔ ہم اپنے گھر سمیت سب کچھ بیچ چکے ہیں ۔
