لاہور( این این آئی) پنجاب حکومت نے بار بار کی وارننگز کے باوجود اسٹیج ڈراموں میں بیہودہ ڈانسز اور فحش حرکات سے باز نہ آنے پر کریک ڈائون کا آغاز کرتے ہوئے لاہور ڈویژن کے تمام تھیٹرز کو سیل کر دیا ۔نگران صوبائی وزیر اطلاعات و ثقافت عا مر میر کی جانب سے جاری بیان میں کہا گیا ہے کہ ثقافت کے نام پر فحاشی اور عریانی کو فروغ دینے والے تھیٹرز کے خلاف کریک ڈائون کا فیصلہ مجبور ہو کر کیا گیا یہ تاکہ تھیٹر مالکان اور ڈرامہ پروڈیوسرز کو اس معاملے میں حکومت کی سنجیدگی کا اندازہ ہو سکے ۔ انہوں نے کہا کہ پنجاب بھر میں تمام تھیٹرز اور اسٹیج ڈراموں کو مانیٹر ز کرنے کی ذمہ دار ی پنجاب آرٹس کونسل کو سونپ دی گئی ہے اور جہاں کہیں بھی بیہودگی ، فحاشی اور عریانی کا عنصر نظر آئے گا اس تھیٹر کو سیل کر دیا جائے گا، ڈرامے کے پروڈیوسرکو بلیک لسٹ اور ڈانسرز پر مکمل پابندی عائد کر دی جائے گی ۔ انہوں نے کہا کہ کمشنر لاہور کی زیر قیادت ایک خصوصی ٹیم نے رات گئے تماثیل تھیٹر لاہور میں فحش مجرے کی شکایت پر چھاپہ مارا اور ڈرامہ روک کر تھیٹر کو سیل کر دیا گیا ۔ شیخوپورہ اور قصور میں بھی فحش مجروں کی شکایات کے بعد تھیٹرز کو سیل کرنے کا فیصلہ کیا گیا ۔
