لاہور ( این این آئی) سابق وزیراعظم وپاکستان مسلم لیگ (ن) کے صدر شہباز شریف سے پارٹی رہنمائوں نے ملاقاتیں کیں جس میں پارٹی قائد نواز شریف کی وطن واپسی پر استقبال کی تیاریوں پر بات چیت ہوئی ۔ شہباز شریف سے سعید احمد خان منہیس آصف سعید منہیس، طلال چوہدری، خواجہ احمد حسن، رانا احسان افضل اور ملک محمد احمد خان نے الگ الگ ملاقات کی ۔ جس میں ملک کی مجموعی صورتحال اور عام انتخابات کے حوالے سے امور بھی زیر غور آئے ۔پارٹی رہنمائوں نے اپنے اپنے علاقوں میں 21اکتوبر کے حوالے سے ہونے والی تیاریوں سے متعلق آگاہ کیا۔ اس موقع پر شہباز شریف نے کہا کہ نواز شریف کی واپسی سے عوام میں ایک نئی امید، حوصلہ اور امنگ جاگی ہے، نواز شریف نے ہر بار نظام بہتر بنایا، بہتر چلایا اور عوام کو اس بہتری کا ثمر ملا،نواز شریف کی قیادت میں مسلم لیگ (ن) کی پالیسیوں کا تسلسل رہتا تو آج مہنگائی ہوتی اور نہ یہ بحران ہوتا ۔ انہوں نے کہا کہ آج پاکستان میں یہ حالات کیوں ہیں؟ 2018سے 2022کادور اس کا جواب ہے۔ پارٹی رہنمائوں نے 21 اکتوبر کو قائد محمد نوازشریف کے بھرپور اور تاریخی استقبال کے عزم کا اظہار کیا ۔
