نگران وزیر داخلہ سے چینی سفیر کی ملاقات ، دوطرفہ تعلقات سمیت باہمی دلچسپی کے امور پر تبادلہ خیال

0
0

اسلام آباد(این این آئی)نگران وزیر داخلہ سرفراز احمد بگٹی سے چین کے سفیر جیانگ ژائی ڈانگ نے ملاقات کی جس میں دوطرفہ تعلقات سمیت باہمی دلچسپی کے امور پر تبادلہ خیال کیا گیا ۔ اس موقع پر وزیر داخلہ نے کہاکہ پاکستان اور چین کے درمیان کئی دہائیوں پر مشتمل دوستی دنیا بھر کے لئے مثال ہے۔ انہوںنے کہاکہ وزیراعظم پاکستان انوارالحق کاکڑ نے چین کا کامیاب دورہ کیا، جس سے سکیورٹی سمیت مختلف شعبوں میں تعاون مزید مضبوط ہو گا۔ وزیر داخلہ نے کہاکہ اگلا ہدف دورے کے دوران کئے گئے معاہدوں کو عملی جامہ پہنانا ہے، چینی صدر شی جن پنگ کا گلوبل سیکیورٹی انیشیٹیو قابل ستائش ہے۔ وزیر داخلہ نے کہاکہ گلوبل سکیورٹی کو بڑھانے کیلئے پاکستان ہر قسم کے بین الاقوامی تعاون میں فعال کردار ادا کرنے کو تیار ہے ۔ نگران وزیرداخلہ نے کہاکہ چینی شہریوں کی سیکیورٹی کو یقینی بنانے کیلئے ہر ممکن اقدامات کئے گئے ہیں۔چینی سفیر نے چینی باشندوں کو ہر ممکن سیکیورٹی فراہم کرنے پر وزیر داخلہ کا شکریہ ادا کیا۔ وزیر دادخلہ نے کہاکہ دہشت گردی ایک چیلنج ہے مگر ہم نے اسے پہلے بھی شکست دی ہے اور انشاللہ اس مرتبہ بھی اس کا مکمل خاتمہ کریں گے۔چینی سفیر نے دہشت گردی کے خلاف جنگ میں پاکستان کے کردار کو بھی سراہا ۔ملاقات میں سیکورٹی کے شعبے میں تعاون کو مزید آگے بڑھانے پر اتفاق کیا گیا ۔