اسلام آباد (این این آئی)نگران وفاقی وزیر اطلاعات مرتضیٰ سولنگی نے کہا ہے کہ الیکشن کمیشن آئین اور قانون کی روشنی میں اپنے لائحہ عمل کا اعلان کرے گا، ہم الیکشن کمیشن سے باز پْرس نہیں کر سکتے اور نہ ہی اس کی نگرانی کر سکتے، درحقیقت الیکشن کمیشن نگران حکومت کی نگرانی کرتا ہے۔الیکشن کمیشن کے باہر میڈیا سے گفتگو کرتے ہوئے انہوںنے کہاکہ الیکشن کمیشن آئین اور قانون کی روشنی میں اپنے لائحہ عمل کا اعلان کریگا۔ انہوںنے کہاکہ آئین کے آرٹیکل 218(3) کے تحت ملک میں انتخابات کرانے کا واحد ذمہ دار آئینی ادارہ الیکشن کمیشن آف پاکستان ہے، ہم الیکشن کمیشن سے باز پْرس نہیں کر سکتے اور نہ ہی اس کی نگرانی کر سکتے، درحقیقت الیکشن کمیشن نگران حکومت کی نگرانی کرتا ہے۔ انہوںنے کہاکہ اگر کسی کو الیکشن کمیشن سے شکایت ہے تو وہ الیکشن کمیشن سے رابطہ کر سکتا ہے۔ انہوںنے کہاکہ ڈسٹرکٹ ریٹرننگ افسران کی تعیناتی کا اختیار الیکشن کمیشن کے پاس ہے۔ نگران وزیر اطلاعات نے کہاکہ پاکستان کے اندر آئینی حکومت ہے، ہم آئینی عمل کی پیداوار ہیں، آئین کے آرٹیکل 19 اور 19 اے کے تحت ہر ایک کو آزادی اظہار رائے کا حق حاصل ہے۔ نگران وزیراطلاعات نے کہاکہ میڈیا آزاد ہے، اس پر کسی قسم کی پابندی نہیں، تمام رجسٹرڈ سیاسی جماعتوں کو یکساں مواقع فراہم کر رہے ہیں۔ انہوںنے کہاکہ سیاسی جماعتوں کے رہنمائوں کو تنقید کا حق حاصل ہے۔
