لاہور( این این آئی)نیشنل سنٹرل بیورو انٹرپول پاکستان نے ایک سال کے دوران 120ملزمان کو مختلف ممالک سے گرفتار کیا، انٹرپول کے ذریعے 279افراد کے ریڈ وارنٹس بھی جاری کیے گئے۔رپورٹ کے مطابق سال 2023کے دوران 120انتہائی مطلوب اشتہاری ملزمان کو مختلف ممالک سے گرفتار کیا گیا۔ جبکہ 36ملزمان بیرون ملک روانگی اور آمد پر پکڑے گئے۔ گرفتار ملزمان پنجاب، خیبر پختونخواہ اور اسلام آباد پولیس کو انتہائی مطلوب تھے۔اعداد وشمار کے مطابق یو اے ای سے 45، سعودی عرب سے 12، عمان سے 13 ملزمان گرفتار ہوئے۔ کینیڈا ، کویت ، کمبوڈیا ، اٹلی ، سپین ، آسٹریلیا ، آئرلینڈ ، فرانس، ترکی ، جاپان اور سوئٹزرلینڈ سے مجموعی طور پر 14 ملزمان کو گرفتار کیا گیا۔رپورٹ میں مزید کہا گیا ہے کہ انٹرپول نے ایک سال میں 303 نوٹسز بھی جاری کئے جن میں 279 ریڈ نوٹ شامل ہیں۔
