اسلام آباد(این این آئی)وفاقی بیوروکریسی میں تقرر و تبادلے کے ذریعے سابق وزیراعظم شہبازشریف کی بیوروکریسی ٹیم کی وزیر اعظم آفس میں دوبارہ تعیناتی کا عمل شروع ہوگیا ہے۔نجی ٹی وی کے مطابق وفاقی بیوروکریسی میں تقرر و تبادلے کے ذریعے سابق وزیراعظم شہبازشریف کی بیوروکریسی ٹیم کی وزیر اعظم آفس میں دوبارہ تعیناتی کا عمل شروع ہوگیا ۔شہبازشریف کے وزیراعظم بننے سے قبل وزیر اعظم آفس میں اہم تعیناتی کردی گئی ، سمیر احمد سیدکوپنجاب حکومت سے تبدیل کرکے وزیر اعظم آفس میں جوائنٹ سیکرٹری تعینات کیا گیا ہے۔سمیراحمد سید بطور وزیراعظم شہبازشریف کے پرنسپل اسٹاف آفیسر اور نگران وزیراعلیٰ پنجاب محسن نقوی کے سیکرٹری تعینات تھے، وہ پی ایس او ٹو وزیراعظم کی ذمہ داریاں بھی نبھائیں گے۔دریں اثنا اسٹیبلشمنٹ ڈویژن میں تقرر کے منتظر گریڈ22کے افسر پرویز احمد جونیجو اور گریڈ20کی افسر عائشہ زرین صدیق او ایس ڈی اسٹیبلشمنٹ ڈویژن بنا دئیے گئے ہیں۔مزید برآں او ایس ڈی محمد سلیم ڈپٹی سیکرٹری وزارتِ اوورسیز پاکستانیز تعینات کیے گئے ہیں جبکہ ڈپٹی سیکرٹری وزارت مذہبی امور محمد راضی کی خدمات این ڈی ایم اے اور ڈپٹی سیکرٹری خزانہ ڈویژن ملٹری فنانس ونگ کاشف رشید کی خدمات آڈیٹر جنرل پاکستان کو واپس کی گئی ہیں۔ڈپٹی سیکرٹری اوورسیز پاکستانیز ڈویژن عبدالواحد تھہیم کو اسٹیبلشمنٹ ڈویژن رپورٹ کرنے کی ہدایت کی گئی ہے۔
