اسلام آباد (این این آئی)وفاقی وزیر صنعت و پیداوار اینڈ فوڈ سکیورٹی رانا تنویر حسین نے کہا ہے کہ سابق وزیر اعظم محمد نواز شریف اعلیٰ فوجی قیادت اور پاکستان کے سائنسدانوں کو خراج تحسین پیش کرتا ہوں جن کے مصمم ارادے اور حوصلے کی وجہ سے پاکستان کا دفاع ہمیشہ کے لئے ناقابل تسخیر ہو گیا۔منگل کو یوم تکبیر کے موقع پر وفاقی وزیر صنعت و پیداوار اینڈ فوڈ سکیورٹی رانا تنویر نے خصوصی پیغام میں کہا کہ پاکستان مسلم لیگ کی اعلیٰ قیادت بالخصوص سابق وزیر اعظم محمد نواز شریف اعلیٰ فوجی قیادت اور پاکستان کے سائنسدانوں کو خراج تحسین پیش کرتا ہوں جن کے مصمم ارادے اور حوصلے کی وجہ سے پاکستان کا دفاع ہمیشہ کیلئے ناقابل تسخیر ہو گیا،پاکستان کی سیاسی فوجی قیادت اور سائنسدانوں نے ملکر اس دن کو اس خطے میں ہمیشہ کے لئے طاقت کا توازن قائم کیا۔رانا تنویر نے کہا کہ پاکستان نے مسلسل دفاعی خطرات کے پیش نظر ایک اہم سنگ میل عبور کیا،آج کا دن یقینی طور پر ہمارے لیے باعث فخر ہے،جب ہمارا ملک وطن عزیز دنیا کے نقشے پر ایک ایٹمی طاقت کے طور پر ابھرا۔رانا تنویر نے کہا کہ یوم تکبیر اس بات کا آئینہ دار ہے ،اگر قوم متحد ہو اور ارادہ مضبوط تو کسی بھی بیرونی اور اندرونی خلفشار پھیلانے والوں کا بھر پور مقابلہ کر سکتے ہیں اور انہیں شکست فاش دے کر ملک کو معاشی طور پر مضبوط بنا سکتے ہیں،ملک کے دفاع اور پاکستان کی معیشت کو مستحکم کرنے کیلئے سر سبز ہلالی پرچم تلے مل کر جمع ہو جائیں۔
