کراچی (این این آئی)گلوکارہ میشا شفیع نے حال ہی میں سابق پاکستانی پاپ گلوکارہ نازیہ حسن کا مقبول گانا ”بوم بوم” گایا ہے جسے بے حد پسند کیا جارہا ہے۔ڈیجیٹل میوزک شو ”ویلوسائونڈ اسٹیشن” کے لیے گایا گیا یہ گانا یوٹیوب پر ایک ہفتے میں 70 لاکھ سے زیادہ بار دیکھا جاچکا ہے اور مداحوں میں تیزی سے مقبول ہورہا ہے۔اس گانے پر جہاں مداحوں کی جانب سے پسندیدگی کا اظہار کیا جارہا ہے وہیں مرحوم گلوکارہ کے بھائی اور ساتھی گلوکار زوہیب حسن نے بھی ان کی بہت تعریف کی ہے اور اپنی بہن کو خراج عقیدت پیش کرنے پر ان کا شکریہ بھی ادا کیا ہے۔ میشا شفیع نے زوہیب حسن کے سوشل میڈیا پیغام کے اسکرین شاٹ کو انسٹاگرام پر شیئرکرتے ہوئے کہا ہے کہ پوری دنیا سے موصول ہونے والی محبتوں اور تعریفوں میں سے کچھ بھی اس تعریف سے سے مطابقت نہیں رکھتا، یہ تعریف میرے اور پوری ٹیم کے لیے بہت زیادہ اہمیت کی حامل ہے۔خیال رہے کہ”بوم بوم” نازیہ حسن نے 1982 میں بھارتی فلم ‘اسٹار’ کے لیے گایا تھا جو کہ بہت مقبول ہوا تھا اور اس گانے پر نازیہ حسن کو فلم فیئر ایوارڈ کے لیے بہترین پلے بیک فیمیل سنگر کی کیٹگری کے لیے بھی نامزد کیا گیا تھا۔
