گڑھی خدا بخش (این این آئی)پاکستان مسلم لیگ (ن) کی نائب صدر مریم نوازشریف نے بلاول بھٹو اور آصفہ بھٹو کے ہمراہ بی بی شہید کے مزار پر حاضری دی اور پھولوں اور دعائوں کے تحفے پیش کئے۔ مسلم لیگ (ن) کی ترجمان مریم اور نگزیب کے مطابق مریم نوازشریف نے بلاول بھٹو اور آصفہ بھٹو کے ہمراہ بی بی شہید کے مزار پر حاضری دی اور پھولوں اور دعائوں کے تحفے پیش کئے، بیان میں کہاگیاکہ یہ ہے پاکستان کی حقیقی جمہوریت کی اصل تصویر،پاکستان اور عوام کی خاطر محترمہ بے نظیر بھٹو شہید اور قائد محمد نوازشریف نے اپنے فہم وفراست اور اخلاص سے جس میثاق جمہوریت کی بنیاد رکھی تھی، وہ امانت آج بلاول اور مریم کی صورت آئندہ نسلوں کو منتقل ہوچکی ہے۔ بیان میں کہاگیا کہ مٹی کی چادر اوڑھ کر سونے والے گو آج ہم میں عملی طورپر تو موجود نہیں تاہم ان کے شعور کی روشنی تیز تر ہورہی ہے، ان کی قربانیوں سے نورجمہوریت پھیل رہا ہے، آئین وجمہور کے قاتلوں کی پھیلائی ظلمت و سیاہی مٹارہا ہے۔
