اسلام آباد (این این آئی)وزیرِ خارجہ مخدوم شاہ محمود قریشی نے کہاہے کہ پی ڈی ایم کے دبائو پر مستعفی نہیں ہونگے،پی ڈی ایم کے احتجاج سے ہمیں کوئی ٹینشن نہیں، جو خود محتاج ہو وہ احتجاج کیا کرے گا؟،وزیرِ اعظم کو ایوان کا اعتماد حاصل ہے، عمران خان پی ڈی ایم کے کہنے پر کیوں مستعفی ہونگے؟۔ملتان میں میڈیا سے گفتگو کرتے ہوئے وزیرِ خارجہ مخدوم شاہ محمود قریشی نے حکومت مخالف اتحاد پی ڈی ایم کی پریس کانفرنس پر اپنے ردِ عمل کا اظہار کرتے ہوئے کہا کہ پی ڈی ایم 31 جنوری کا انتظار کیوں کر رہی ہے؟۔انہوں نے کہا کہ ہمارے پاس عوام کا مینڈیٹ ہے، وزیرِ اعظم عمران خان کو ایوان کا اعتماد حاصل ہے، عمران خان پی ڈی ایم کے کہنے پر کیوں مستعفی ہوں گے؟۔وزیر خارجہ نے کہاکہ پی ڈی ایم کی ساڑھے 5 گھنٹے کی طویل نشست بے نتیجہ رہی، پوری قوم پی ڈی ایم کی حقیقت جان چکی ہے۔انہوں نے کہا ہے کہ پاکستان ڈیمو کریٹک موومنٹ کے احتجاج سے ہمیں کوئی ٹینشن نہیں، جو خود محتاج ہو وہ احتجاج کیا کرے گا؟۔
