لاہور (این این آئی)قومی احتساب بیوو ( نیب )لاہور کی تحقیقاتی ٹیم نے مسلم لیگ (ن) کے رہنما خواجہ آصف کا بینامی دار ملازم ڈھونڈ لیا ہے۔نیب کے مطابق خواجہ آصف نے اپنے ملازم طارق میر کو اپنی کمپنی کا 50 فیصد کا مالک بنا رکھا ہے ۔خواجہ آصف نے اپنے ملازم طارق میر کے نام پر 2009 میں کمپنی رجسٹرڈ کروائی کمپنی کے بقیہ 50 فیصد شئیرز مسرت خواجہ کے نام پر ہیں ۔ایم ایس طارق میر کے اکائونٹ میں 9 سالوں میں کروڑوں روپے جمع ہوئے ،2009 سے 2018 تک کمپنی میں 50 کروڑ 70 لاکھ جمع ہوئے، یہ فرم لوکل مارکیٹ سے چاول خرید کر بیرون ممالک ایکسپورٹ کرتی تھی۔ خواجہ آصف کے ملازم طارق میر کو انکے روبرو بیٹھا کر تفتیش کی جائے گی اور خواجہ آصف سے پوچھا جائے گا کہ اتنی بھاری رقوم کس نے اور کیوں جمع کروائیں ،عدم تعاون کی صورت میں طارق میر کو گرفتار بھی کیا جاسکتا ہے۔
