سرینگر(این این آئی)بھارت کے غیر قانونی زیر قبضہ جموںوکشمیر میںجموں و کشمیر ماس موومنٹ کے چیئرمین مولوی بشیر احمد عرفانی نے اقوام متحدہ اور انسانی حقوق کی بین الاقوامی تنظیموں پر زوردیاہے کہ وہ مقبوضہ علاقے میں بھارتی فوجیوں کی طرف سے بڑے پیمانے پرجاری نہتے کشمیریوں کے قتل عام ، غیر قانونی گرفتاریوںاور وحشیانہ ظلم وتشدد کا نوٹس لیں ۔ کشمیرمیڈیاسروس کے مطابق مولوی بشیر احمد عرفانی نے سرینگر سے جاری ایک بیان میں گزشتہ روز بھارتی فوجیوں کے ہاتھوں کولگام میں شہید ہونے والے کشمیری نوجوانوں کوزبردست خراج عقیدت پیش کرتے ہوئے کہاکہ مقبوضہ علاقے میں قتل وغارت اور تباہی کا جاری سلسلہ مودی حکومت کا سوچا سمجھا منصوبہ ہے جس کا مقصد کشمیریوںکے جذبہ حریت کو کمزور کرنا ہے ۔انہوںنے کہاکہ بھارت کشمیری عوام کی حق پر مبنی جدوجہد آزادی سے بوکھلاہٹ کا شکار ہے اور وہ کشمیریوں کی حق پر مبنی جدوجہد آزادی کو کمزور کرنے کیلئے فوجی طاقت کے وحشیانہ استعمال کی پالیسی جاری رکھے ہوئے ہے۔ مولوی بشیر احمد نے کہاکہ بھارت نے مقبوضہ جموںوکشمیر کو ایک بدترین مقتل میں تبدیل کردیا ہے
