لاہور( این این آئی)ماضی کی نامور اداکارہ بابرہ شریف نے کہا ہے کہ مجھے فخرہے کہ میں نے اپنے عروج کے دور میں فلم انڈسٹر ی کو خیر باد کہا اورمجھے اس پر کوئی پچھتاوا نہیںہے ،فلم انڈسٹری سے کنارہ کشی اختیار کرنے کے باوجود مجھے کام کرنے کی متعدد بار پیشکش ہوئی لیکن مجھے ایسا کوئی پر کشش کردارنہیں ملا جس کی وجہ سے میرے اندر دوبارہ فلم انڈسٹری میں واپسی کی کوئی خواہش پیدا ہوتی ۔ ایک انٹرویو میںبابرہ شریف نے کہا کہ ہر کسی کا اپنا ذہن ہوتا ہے لیکن میں ان لوگوں میں سے نہیں ہوں جو ہیروئن کے کردار کی عمر پوری کرنے کے بعدماں بہن یا کریکٹرکرداربھی ادا کرنے کیلئے بیتاب ہوں۔انہوں نے کہا کہ ہمارے ہاں بہت اچھے اچھے ہدایتکار تھے لیکن بد قسمتی سے پروڈیوسرزانہیں کسی پراجیکٹ کیلئے اتنا وقت نہیںدیتے تھے جس میں ایک معیاری فلم بنتی ہیں۔انہوںنے کہا کہ فنکار کو یہ لالچ نہیں ہونا چاہیے کہ ہر پراجیکٹ میں صرف اسی نے کردارنبھاناہے اور یہی وجہ ہے کہ یہاںپر بہت سے نامورہیرو اورہیروئنز تھیں جنہوںنے پروڈیوسرزاورہدایتکاروںکو انکار نہیں کیا اور دھڑا دھڑ کام کرتے رہے جس سے ان کی اداکاری پر فرق پڑاہے ۔
