اسلام آباد (این این آئی)پاکستان مسلم لیگ (ن) کی ترجمان مریم اورنگزیب نے وزیراعظم عمران خان سے جھوٹی تقریروں اور ٹویٹس کی بجائے استعفیٰ دینے کا مطالبہ کرتے ہوئے کہا ہے کہ عمران صاحب قوم کو آپ کے بے تکے بھاشن اور جھوٹ نہیں ، استعفیٰ چاہیے ،عمران صاحب آج غیرقانونی فارن فنڈنگ کا جواب دینا تھا، سڑکوں پر ٹوئٹ نہیں ،ٹویٹ اب صرف استعفیٰ دینے کا کریں اب عوام کو کوئی نیا جھوٹ فریب اور مکاری نہیں چاہیے۔ اپنے بیان میں انہوںنے کہاکہ جو سڑکیں اور موٹر ویز نواز شریف بنا گیا وہ پاکستان کی تاریخ میں کسی وزیراعظم نے نہیں بنائیں ،جھوٹی ٹویٹس کر کے نہ سڑکیں بنتی ہیں اور نہ ہی فارن فنڈنگ کا ڈاکہ چھپتا ہے ۔ انہوں نے کہاکہ قوم کو بتائیں کہ فارن فنڈنگ کیس کی تلاشی میں آپ چور ثابت ہوئے ہیں،قوم کو بتائیں کہ آپ نے کن غیرملکی کمپنیوں اور افراد سے کتنے ڈالر کھائے ۔ انہوںنے کہاکہ 2.2 ارب روپے زائد کی فارن فنڈنگ چوری کا جواب دیں، استعفی دیں اور قانون کا سامنا کریں،بتائیں کن ، کتنے اور کون سے غیر ملکیوں سے کتنی غیر ملکی اور غیر قانونی فنڈنگ لی ہے ۔ انہوںنے کہاکہ بتائیں آج تک اپنی غیر قانونی غیر ملکی فنڈنگ کی تفصیلات الیکشن کمیشن میں کیوں جمع نہیں کروائی ،بتائیں سات سال الیکشن کمیشن سے کیوں مفرور رہے اور آج تک فارن فنڈنگ کی کوئی معلومات نہیں دیں ،عمران صاحب آپ نے سڑک بنائی کون سی ہے جسے سستی بتا کر نیا جھوٹ بول رہے ہیں ،جواب دیں فارن فنڈنگ لے کر ملک کو معاشی اقتصادی اور خارجی سطح پہ مفلوج کیا۔
