واشنگٹن ڈی سی (این این آئی) امریکہ نے بھارتی حکمران جماعت بھارتیہ جنتاپارٹی کے عہدیداروں کی طرف سے پیغمبر اسلام صلی اللہ علیہ وسلم کے بارے میں گستاخانہ بیانات کی مذمت کی ہے ۔امریکی محکمہ خارجہ کے ترجمان نیڈ پرائس Ned Price نے پریس بریفنگ کے دوران کہا کہ امریکہ بی جے پی کے دو عہدیداروں کے جارحانہ تبصروں کی مذمت کرتا ہے۔انہوں نے کہاہم مذہب یا عقیدے کی آزادی سمیت انسانی حقوق کے مسائل پر بھارتی حکومت کے ساتھ اعلیٰ سطح پر باقاعدگی سے بات چیت کرتے ہیں اور انہیں انسانی حقوق کے احترام کو فروغ دینے کی ترغیب دیتے ہیں۔ بھارتیہ جنتا پارٹی کی ترجمان نوپور شرما نے 26 مئی کو پیغمبر اسلام صلی اللہ علیہ وسلم کے بارے میں ٹیلیویژن پر توہین آمیز تبصرہ کیا جس کے خلاف پوری اسلامی دنیا کیطرف سے سخت ردعمل سامنے آیا۔عرب ریاستوں نے جن کے بھارت کے ساتھ قریبی تعلقات ہیں سفارتی سطح پر سخت احتجاج کیا۔ مسلم دینا کے شدید رد عمل کے بعد بی جے پی نے نور پور شرما کو پارٹی رکنیت سے معطل کیا ۔پارٹی نے اپنے ایک اور رہنما نوین کمار جندال کو بھی معطل کر دیا جنہوںنے آنحضورۖ کے بارے میں اشتعال انگیز ٹویٹس کیے تھے۔
