اسلام آباد (این این آئی) سابق وزیراعظم عمران خان کی اہلیہ بشریٰ بی بی اور ارسلان خالد کی مبینہ آڈیو لیک کی تحقیقات کیلئے اسلام آباد ہائیکورٹ میں درخواست دائر کر دی گئی جس میں کہاگیاکہ ایف آئی اے سائبر کرائم ونگ آڈیو لیک کی فارنزک تحقیقات کرے، بشریٰ بی بی اور ارسلان خالد کو عدالت بلا کر ویڈیو سے متعلق پوچھا جائے۔درخواست میں کہاگیاکہ آڈیو درست ثابت ہونے کی صورت میں بشریٰ بی بی اور ارسلان خالد کے خلاف سخت کارروائی کی جائے، آڈیو درست ثابت ہونے کی صورت میں بشریٰ بی بی کے خلاف توہین عدالت کی کارروائی شروع کی جائے۔ درخواست میں کہاگیاکہ اڈیو لیک کرنے سے افراد کی نجی زندگی میں مداخلت کی گئی، آڈیو لیک ہونے سے پاکستان کی کلچرل، سوشل اور بین الاقوامی ساخت متاثر ہوئی، آڈیو لیک کرنے والوں کے خلاف قانون کی مطابق کارروائی کی جائے۔ درخواست میں کہاگیاکہ پاکستان میں سوشل میڈیا کو ریگولیٹ کرنے کیلئے کوئی قانون موجود نہیں، سوشل میڈیا پر مواد سے پاکستان کی اندرونی اور بیرونی ساکھ متاثر ہو رہی ہے۔ درخواست میں کہاگیاکہ وزارت داخلہ، وزارت اطلاعات اور پی آئی ڈی سوشل میڈیا رجسٹریشن کے حوالے سے اقدامات کریں، درخواست وکیل محمد آصف گجر کی جانب سے اسلام آباد ہائیکورٹ میں دائر کی گئی،درخواست میں وزارت داخلہ، وزارت اطلاعات، چیئرمین پیمرا اور پی ائی ڈی کو فریق بنایا گیا ہے،ایف آئی اے، انٹیلی جنس بیورو اور سٹیٹ بنک کو بھی درخواست میں فریق بنایا گیا ہے۔
