اسلام آباد (این این آئی)نائب وزیراعظم اوروزیر خارجہ سینیٹر محمد اسحاق ڈار نے کہاہے کہ ادنٰی سیاسی پوائنٹ سکورنگ کے لیے سعودی عرب پر الزام تراشی افسوسناک اور مایوس کن ذہنیت کی عکاس ہے،سیاسی قوتیں اپنے سیاسی مقاصد کے حصول کے لیے پاکستان کی خارجہ پالیسی پر سمجھوتہ کرنے سے باز رہیں۔ جمعرات کو بانی پی ٹی آئی کی اہلیہ کے سعودی عرب سے متعلق تبصرے کے حوالے سے اپنے ایک بیان میں اسحاق ڈار نے کہا کہ پاکستان اور مملکت سعودی عرب قریبی دوست اور بھائی ہیں، یہ رشتہ باہمی احترام پر مبنی ہے۔ انہوں نے کہا کہ ہم سعودی عرب کے ترقی اور خوشحالی کے سفر کے بے حد مداح ہیں۔ پاکستانی قوم کو سعودی عرب کے ساتھ اپنے قریبی تعلقات پر فخر ہے جو ہر مشکل وقت میں ہمیشہ پاکستان کے ساتھ کھڑا رہا ہے۔ انہوں نے تمام سیاسی قوتوں پر زور دیا کہ وہ اپنے سیاسی مقاصد کے حصول کے لیے پاکستان کی خارجہ پالیسی پر سمجھوتہ کرنے سے اجتناب کریں۔
