اسلام آباد(این این آئی)پاکستان مسلم لیگ (ن)کے رہنما سینیٹر طلال چوہدری نے کہاہے کہ وزیراعظم بانی پی ٹی آئی نہیں جو بات سے مکر جائیں،وزیراعظم کی بات پورے پاکستان نے سنی ہے یہ آفر بالکل درست ہے۔نجی ٹی وی کے پروگرام میں گفتگوکرتے ہوئے طلال چوہدری نے کہاکہ وزیراعظم نے پی ٹی آئی کو بڑی مناسب آفر کی ہے، پورا سچ جاننا ہے تو 2014سے چیزوں کو شروع کرنا پڑے گا۔انہوں نے کہاکہ مذاکرات پی ٹی آئی کی فطرت میں نہیں، مذاکرات میں سننا بھی پڑتا ہے اور پی ٹی آئی کو سننے کی عادت نہیں۔طلال چوہدری نے کہاکہ مذاکرات میں بات دلیل سے ہوتی ہے، وزنی دلیل مخالف کی بھی ہو تو مانی جاتی ہے،یہ یک طرفہ طور پر مذاکرات سے دوڑے ہیں۔رہنما ن لیگ نے کہاکہ باہر یہ کچھ اور بات کرتے ہیں اور اندر ان کے پاس دلیل نہیں ہوتی، ہم جو کہہ رہے ہیں کرکے دکھائیں گے، ہمارے دل میں کھوٹ ہوتا تو کیوں آفر کرتے۔
