کراچی (این این آئی)پاکستان شوبز انڈسٹری کی نامور اور خوبرو اداکارہ مہوش حیات ایک بار پھر ٹی وی اسکرینز پر جلوے بکھیریں گی۔مہوش حیات کی 7 سال کے طویل عرصے کے بعد دوبارہ ٹی وی اسکرین پر گرینڈ واپسی ہو رہی ہے، ان کے نئے ڈرامے کا ٹیزر منظرِ عام پر آ گیا ہے جس نے آتے ہی سوشل میڈیا پر دھوم مچا دی ہے۔سیون اسکائی انٹرٹینمنٹ کے یوٹیوب چینل پر ریلیز ٹیزر کو کئی گھنٹوں میں ہی لاکھوں افراد دیکھ چکے ہیں۔سنسنی خیز اور تجسس سے بھرپور ڈرامے میں مہوش حیات کے کم بیک کو مداح خوب پسند کر رہے ہیں جو جلد جیو انٹرٹینمنٹ پر نشر کیا جائے گا۔ڈرامے کی کہانی محبت، معمے اور گہرے رازوں پر مبنی ہو گی، جس میں اداکارہ دو کرداروں میں نظر آئیں گی اور دونوں کردار ایک دوسرے سے کافی مختلف ہیں۔اس میگا پراجیکٹ کے ٹیزر میں مہوش حیات کی آواز میں ڈائیلاگ سنائی دیتا ہے خوشیوں سے میرا رشتہ مختصر سا ہے، اس لیے میں خود کو ان کا عادی نہیں بناتی۔بے مثال اداکاری کے لیے مشہور اداکارہ مہوش حیات کے ساتھ احسن خان اور حرا مانی بھی اہم کردار ادا کر رہے ہیں، ڈرامے میں عثمان پیرزادہ، زینب قیوم، نیر اعجاز، سہیل سمیع، اسامہ طاہر، ندا ممتاز، شمیل خان، افشین حیات اور زہرہ عامر شامل ہوں گے۔مہوش حیات نے پاکستانی ڈراموں میں مقبولیت کے جھنڈے گاڑنے کے بعد ہالی ووڈ میں بھی اپنا لوہا منوایا اور مارول اسٹوڈیوز کی مس مارول میں اداکاری کے جوہر دکھا کر بین الاقوامی سطح پر نام کمایا۔خوبرو اداکارہ مہوش حیات آخری بار 2016 میں ڈرامہ سیریل دل لگی میں ہمایوں سعید کے ساتھ نظر آئی تھیں، مداح طویل عرصے سے ان کی واپسی کے منتظر تھے۔
