لاہور( این این آئی) وزیر اعلیٰ پنجاب کے ترجمان فیاض الحسن چوہان نے کہا ہے کہ دنیا کی تاریخ میں پہلی بار پولیس اسمبلی ہال میں داخل ہوئی جہاں خواتین پارلیمنٹرینز کو مارا پیٹا گیا، ایک خاتون پارلیمنٹرین پولیس کے تشدد سے ڈیڑھ ماہ موت و حیات کی کشمکش میں رہی۔ اپنے بیان میں انہوںنے کہا کہ بزرگ پارلیمنٹرینز پر تاریخ میں پہلی بار حمزہ شہباز اور چھوٹو تارڈ کے ایما ء پر تشدد ہوا ،ساری غنڈہ گردی اور بدمعاشی حمزہ شہباز، چھوٹو تارڈ اور ان کی قیادت کی ایما ء پر ہوئی۔ (ن) لیگ کے جن اراکین اسمبلی نے چودھری پرویز الٰہی کے خلاف غنڈہ گردی کی ان کی فوٹیج موجود ہے،یہ بدمعاش ٹولہ اب عوام کے سامنے معصوم بننے کی کوشش کر رہا ہے، اب قانون اور انصاف کے مطابق کاروائی ہو رہی ہے تو ان کی چیخیں مریخ تک سنائی دے رہی ہیں۔انہوں نے کہا کہ یہی چھوٹو تارڈ نمرود اور فرعون بن کر ذو معنی اشارے بازی کر کے اسمبلی کا مذاق اڑایا کرتا تھا،ابب قانون اور آئین کے مطابق کاروائی ہو رہی ہے تو اس کو پنجاب پولیس میں خامیاں نظر آنا شروع ہو گئی ہیں، عوام ان کی ڈرامے بازیوں اور دو نمبریوں سے خوب آگاہ ہے۔
