لاہور( این این آئی) اداکار فیروز خان پر ان کی اہلیہ نے ذہنی و جسمانی تشدد اور بے وفائی کا الزام عائد کرتے ہوئے کہا ہے کہ اپنی پوری زندگی اس ہولناک طریقے سے نہیں گزار سکتی ۔علیزہ سلطان نے کہا کہ ان کی شادی کے 4 سال انتہائی تلخ رہے، اس دوران میں نے شدید ذہنی اور جسمانی تشدد برداشت کیا۔شادی کے دوران شوہر کی جانب سے بے وفائی، بلیک میلنگ اور تذلیل بھی برداشت کرنی پڑی۔ انتہائی سوچ و بچار کے بعد میں اس نتیجے پر پہنچی ہوں کہ میں اپنی پوری زندگی اس ہولناک طریقے سے نہیں گزار سکتی۔علیزہ سلطان خان نے کہا کہ فیروز خان سے علیحدگی کا فیصلہ اپنے بچوں کے بہتر مستقبل اور بہبود کے لئے کیا ۔ میں نہیں چاہتی کہ میرے بچے اس زہریلے اور پرتشدد گھرانے میں پروان چڑھیں۔ مجھے ڈر ہے کہ کہیں ان کے ساتھ گزارہ وقت میرے بچوں کے ذہنوں پر منفی اثرات مرتب نہ کرے۔میں اپنے بچوں کو سکھائوں گی کہ کوئی زخم اتنا گہرا نہیں ہوتا کہ مندمل نہ ہو سکے، کوئی زخم اتنا شرمناک نہیں کہ اسے تحفظ کی قیمت پر چھپایا جا سکے۔
