لاہور(این این آئی) فلم ‘جوائے لینڈ’ کیخلاف شکایات پر غور کیلئے وزیراعظم نے کمیٹی بنادی،فلم 18 نومبر کو سیمنا گھروں میں نمائش کے لیے پیش کی جانی تھی لیکن وزارت اطلاعات و نشریات کی جانب سے اس فلم کی نمائش پر پابندی کا نوٹیفیکیشن جاری کر دیا گیا تھا۔تفصیلات کے مطابق وزیر اعظم شہباز شریف نے فلم ‘جوائے لینڈ’ کے خلاف شکایات پر غور کے لیے 8 رکنی کمیٹی تشکیل دے دی۔وزیر قانون کی سربراہی میں 8 رکنی کمیٹی میں اطلاعات، مواصلات، سرمایہ کاری اور آئی ٹی کے وزراء شامل ہیں۔مشیر برائے گلگت بلتستان، چیئرمین پی ٹی اے اور چیئرمین پیمرا بھی کمیٹی کا حصہ ہیں۔کمیٹی فلم کی سماجی اور اخلاقی اقدار کے خلاف شکایات پر غور کرے گی اور اپنی رپورٹ وزیر اعظم کو پیش کرے گی۔فلم کی کاسٹ میں سرمد کھوسٹ، ثروت گیلانی، علینا خان، سہیل سمیر، سلمان پیر، ثانیہ سعید، کنول کھوسٹ، زویا احسن، ثنا جعفری اور قاسم عباس سمیت دیگر اداکار شامل ہیں۔واضح رہے کہ بین الاقوامی ایوارڈ یافتہ فلم ‘جوائے لینڈ’ پاکستان میں ریلیز سے قبل تنقید کی زد میں آگئی تھی، جس کے باعث 18 نومبر کو پاکستان میں ریلیز ہونے والی اس فلم کی نمائش کھٹائی میں پڑ گئی ہے۔
