نیویارک (این این آئی )اقوام متحدہ نے بیت المقدس کے مقدس مقامات کی کی حیثیت کو برقرار رکھنے اور فلسطین اسرائیل مسئلہ کے دو ریاستی حل پر زور دیتے ہوئے کہاہے کہ میرا ماننا یہ ہے کہ اس کے لئے کوئی پلان بی نہیں ہے اور دو ریاستی حل کے امکان کو مسترد کرنا مشرق وسطی میں ہمیشہ کے لیے امن کے امکانات کو کمزور کر دے گا۔غیرملکی خبررساں ادارے کے مطابق اقوام متحدہ کے سیکرٹری جنرل انتونیو گوتریس نے نیویارک میں اقوام متحدہ کے ہیڈ کوارٹر میں عرب گروپ کے توسیعی ٹرائیکا کے مستقل نمائندوں سے ملاقات صحافیوں سے بات کرتے ہوئے کہا کہ مجھے اس بات کی تصدیق کرنے کا موقع ملا کہ ہمیں بیت المقدس میں مقدس مقامات کی حالت کو برقرار رکھنا چاہیے اورکسی بھی ایسے اقدام سے گریز کیا جائے جس سے دو ریاستی حل کو خطرہ لاحق ہو۔ان کاکہنا تھا کہ اسرائیل فلسطین میں بستیوں کی تعمیر، بے دخلی، گھروں کی تباہی نہ صرف فلسطینی عوام بلکہ کئی ممالک میں شدید غصہ اور مایوسی پیدا کر رہی ہے۔انہوں نے دو ریاستی حل کے بارے میں کہا کہ میرا ماننا یہ ہے کہ اس کے لئے کوئی پلان بی نہیں ہے اور دو ریاستی حل کے امکان کو مسترد کرنا مشرق وسطی میں ہمیشہ کے لیے امن کے امکانات کو کمزور کر دے گا۔
