ممبئی (این این آئی ) بالی ووڈ کی معروف اداکارہ روینہ ٹنڈن کو بھارت کے اعلیٰ ترین ” پدما شری ” ایوارڈ سے نوازا گیا ہے۔میڈیا رپورٹس کے مطابق ہندوستان کے 74 ویں یوم جمہوریہ کے موقع پر حکومت کی جانب سے پدما شری ایوارڈ یافتہ افراد کی فہرست جاری کی گئی جس میں اداکارہ روینہ ٹنڈن کا نام بھی شامل ہے۔معروف اداکارہ نے اس حوالے سے اپنے ایک بیان میں کہا کہ میں اس اہم اعزاز سے نوازے جانے پر بھارتی حکومت کی مشکور ہوں، میں ان تمام لوگوں کا شکریہ ادا کرتی ہوں جنہوں نے سینما کے آرٹ اور کرافٹ کے اس سفر میں میری رہنمائی کی۔یاد رہے کہ اس سے قبل سماجی خدمات اور خواتین کو بااختیار بنانے میں سرگرم روینہ ٹنڈن کو جی 20 کی صدارت میں وومن امپاورمنٹ ونگ (ڈبلیو 20) میں نمائندگی کے لیے بھی منتخب کیا گیا ہے۔
