لاہو ر( این این آئی) پاکستان تحریک انصاف کے سیکرٹری جنرل اسد عمر نے کہا ہے کہ عمران خان کی گرفتاری سے آسمان نہیں ٹوٹے گا، امید ہے کہ جیل بھرو تحریک کی نوبت نہیں آئے گی۔انہوں نے نجی ٹی وی سے گفتگو کرتے ہوئے الزام عائد کیا کہ حکومتی رہنما آئین شکنی کی باتیں کررہے ہیں، امید ہے جیل بھرو تحریک شروع کرنے سے پہلے ہی عدلیہ، آئین توڑنے والوں کی راہ میں رکاوٹ بنے گی۔اسد عمر نے کہا کہ عمران خان کی یا میری گرفتاری سے آسمان نہیں ٹوٹے گا، صرف اتنا بتادیں کہ کس قانون کے تحت گرفتار کریں گے، امید ہے کہ جیل بھرو تحریک کی نوبت نہیں آئے گی اور عدلیہ آئین توڑنے والوں کے راستے میں دیوار بنے گی۔تحریک انصاف کے دور میں آئی ایم ایف کی شرائط کے حوالے سے سوال پر اسد عمر نے کہا کہ ہمارے دور میں ڈالر 178روپے کا تھا جو آج 276کا ہوگیا ہے، پیٹرول اور دالوں سمیت دیگر اشیا کئی گنا مہنگی ہوچکی ہے۔
